قصة تطوعي في رسالة

25 أغسطس، 2018

أضف تعليق

💡 السكربت


نبدأ بحكاية تطوع …

أنا أول مرة أتطوع كان في رسالة فرع الزقازيق سنه 2007، ومش هاحكيلكم على شكل المتطوع الجديد لما ما فيش مسئول يعبره. بس الحمد لله وبعد عدة ايام منتظر حد يوجهني ازاي … كنت بدأت اقرر اني هامشي بالصدفة وانا خارج من الجمعية قابلت راجل نازل من تاكسي وطلب مني اوصله لجوه وعرفت انه كفيف كان اسمه د. جمال “الله يرحمه”، دكتور جمال كان بيجي رسالة عشان المتطوعين يقرأ له الكتب عشان كان بيحضر رسالة ماجستير في كلية آداب علم اجتماع .

د. جمال اتعرف على مشكلتي وطلب مني أقرأ من الكتاب في صفحة رقم 79 واللي كانت بتتكلم عن انك متستناش حد يوجهك، بادر بنفسك وأبدأ انت اللي تكون صاحب الريادة. ومن وقتها بدأت ادخل في انشطة كتير لحد ما دخلت فريق انقاذ الحياة اللي كان وقتها اسمه نشاط المتبرعين بالدم، وكانوا بيعملو حملة تبرع لصالح الاطفال في مستشفى الجامعه في كل الشرقية، ورحت معاهم فاقوس وابو كبير وابو حماد واقترحت عليهم يجوا يعملوا حملة في #بلبيس خصوصاً انها كانت قريبه من الزقازيق والحمد لله الحملة نجحت عندنا وجمعت اكبر اكياس دم على مستوى الشرقية، من هنا عرفت ان بلدنا مليانه خير ومحتاجه بس حد يبدأ يعرف الناس الطريق.

وبدأت انا احلم بفرع لرسالة في بلبيس. ولفت الايام لحد ما خلصت الجامعة ودخلت الجيش وقامت ثورة 25 يناير، ووقتها كنت بادور ازاي يكون في فرع لرسالة بلبيس. والحمد لله ما كنتش لوحدي، كان في شباب متطوعين بردو في رسالة الزقازيق والعاشر من رمضان وفروع القاهرة وشباب تاني عمره ما اتطوع في رسالة بس كان حلمهم يبدأ الخير ينتشر في بلبيس وننشر ثقافة التطوع في بلدنا اتجمعنا كلنا سوا عشان نبدأ رحلة الخير … رحلة الامل لبلدنا كانت بداية رسالة بلبيس في أغسطس 2011 رمضان 1432 في مقرها بالمنشية مع أول إجتماع لبدء نشاط الجمعية مع أقل من 20 متطوع ومتطوعة مقر بلا إمكانيات أو تبرعات لتقديمها للمحتاجين .. فقط نية صادقة من المتطوعين وبمساعدة فرعي رسالة العاشر من رمضان والزقازيق.

يوتيوب قناة ALFARISws

وأول الأنشطة خلال شهر رمضان كانت هي البحث عن الحالات المستحقة عن طريق الأبحاث والاستكتشافات عشان نقدملهم المساعدات اللي يستحقوها وبدأنا بطبق الخير اللي كان بالجهود الذاتيه بنجمع وجبات من البيوت حوالينا ونوزعها عالمحتاجين والحمد لله زاد نشاط الجمعية من 10 وجبات في اليوم أول سنه لينا إلى 2000 وجبة يوميا رمضان اللي فات.

وزادت الأنشطة و المتطوعين في الفرع ووصلت لأكثر من 15 نشاط هي ( المساعدات – الدعايا والتسويق – طبق الخير – الزيارات الخارجية – دروس التقوية – ذوي الإحتياجات الخاصة – محو الأمية – تحفيظ القرءان – إعمار المساجد – فريق أنوار رسالة – الورشة الفنية – فريق إنقاذ الحياة- فريق قد الحياة لتأهيل أطفال الشوارع – مشاوير الخير …. ) .

وكان لدى الفرع من أول يوم تحدى كبير لنشر ثقافة العمل التطوعي في مركز بلبيس وتغيير نظرة المجتمع لتقديم المساعدات للمحتاجين .. مما جعل الجمعية تواجه نقص الموارد المادية والبشرية بشكل دائم لكن شباب الخير أهل للتحدي، بعد سنتين ونصف في عمل دؤوب في الجمعية حصل الفرع على رقم الإشهار 3190 في ديسمبر 2013 وتقدمت رسالة بلبيس خطوة تجاه مجمع رسالة الخيري الأول من نوعه في بلبيس .. ( دار أيتام ومسنين ومستشفى خيري ومركز تأهيل للإعاقات ومركز لإدارة الخدمات التي تقدمها الأنشطة للمجتمع ) اللي بيه هيكون في بلبيس منارة للخير هتستمر أكتر تكبر أكتر واكتر ولسه على حلمنا مكملين ^_^ .

قصة متطوع في رسالة

صوت: أحمد فارس / سكربت: سارة ترك / صوت وموسيقى: أشرف فارس
الرابط على Soundcloud 🎧

Published by

أحمد فارس

مصمم واجهات مواقع انترنت وتطبيقات موبايل وكذلك متمرس في تطوير مواقع الانترنت، اهتم واتعلم تجربة المستخدم،مسلم مصري مهتم بالاعمال والانشطة التطوعية،مؤمن بالريادة كاسلوب حياة بترك واحداث الأثر والعيش بالتحديات المخلوطة بالشغف، لذلك اسست المجرة كأول مساحة عمل مشتركة بالشرقية، ومؤسس مشارك بمبادرة مواعيد ، وايضاً محاضر في تصميم/تطوير الويب وكاتب بعدد من المواقع التقنية.