لماذا من الأفضل أن تتظاهر بأنك لا تعرف شيئا عن الكمبيوتر!

15 يناير، 2010

13 تعليق

بتحصل لأحسن الناس؟
هاحكي قصة صغيرة أوضح بيها وجهة نظري!
بيجيلك واحد صديقك أو معرفة أو حتى من العيلة عايز مساعده منك عشان عرف أنك باشمهندس كمبيوتر.
بتبدي الحكاية بخدمة صغيرة ولانه حد قريب منك ما تقدرش تقوله لأ.
مثال:
يقولك ممكن تيجي تشوفلي الجهاز بتاعي … مش هاخد من وقتك اكتر من خمس دقايق .. دي حاجه صغيرة
وطبعاً بطيبة وحسن نيه تقبل وتروح معاه تشوف ايه المشكلة.
يقولك جهازي مش عارف ليه بطئ .. مع اني منزلو ويندوز اكس بي “يالهوتي السوده.. انا ايه اللي وقعني الوقعه السوده دي”
في العاده بيكون الجهاز قديم جداً من العصور الوسطى “من ايام فحت البحر” وبيكون مبهدله ومليان تراب وعنكبوت من جوه الكيسه والسلوك متلعبكة في بعضها وطبعاً بتكمل جميلك للأخر وتنضفله جهازه.
والكارثة ان الخدمة الصغيرة كبرت واتقلبت لصيانه شامله لجهاز سعادته “ناس معندهاش دم” وتتوالي الطلبات والخدمات“انا اللي جبته لنفسي”
وأول ما تعمله الخدمة يعتبرك عبقرينو الكمبيوتر اللي ما حصلش ومن ساعتها يخليك الدعم الفني المجاني بتاعه ويكلمك على التليفون على اي مشكلة عنده حتى لو كانت صغيرة.

مثال:
يتصل بيك عشان يقولك انه نزل عنده فيروس ومش عارف يفتح حاجه في الجهاز وعايزك تجيله تعمله سكان.
ويبتدي بقى يسألك في كل حاجه تخص الكمبيوتر من برامج وألعاب وأفلام وأغاني ويطلبها منك.

مثال:
يقولك ممكن تجيبلي اسطوانه ويندوز سايكو … انا عارف انت اد ايه عبقري في الحاجات دي وياريت كمان تجيبلي كام لعبه للعيال على كام فيلم اتفرج عليه انا والمدام.

وربنا معاك بقى في اي موقف او مناسبه تقابله فيها او حتى يتكلم مع حد عنك.

وممكن بعد كده يقولك أعملي أيميل وموقع ويكون عايز فيه حاجات بتجري وبتنط وبتلعب.
وخلاص بقيت انت الدعم الفني لكل حاجه بتشتغل بكبس كهربا مش الكمبيوتر وبس …. وياليلتك السوده لو ما عملتلوش خدمة من اللي بيطلبوها تبقى انت لا بتفهم حاجه في الكمبيوتر ولا عمرك فتحت كمبيوتر ويمشي يسيطك ادام كل الناس.
ما انت اللي جبته لنفسك يا باشمهندس
النهاية