– كثيراً ما كنا نسمع عن الحرية في التعبير والصحافة الحرة المستقلة .. واتكلم براحتك بدون قيود ولا سلاسل.
لكن كل ما يحدث يشير الى غير ذلك وان كله كان مجرد كلام في كلام أصل حكومتنا متعودة على الشعارات من قديم الأزل .. ويطلع ريسنا ويؤكد على حرية الصحافة والتعبير عن الرأي .
لكن اللي بيحصل غير كده لانه بمجرد ما حد يقول رأي أو كلام على أصحاب الرئيس المنتظر والإبن الأول في مصر أو حتى نشر مقال عن اشاعة بين الناس .. إلا ويحاكم وكأنه من الفئة الضالة بالمجتمع وتقوم الدنيا وما تقعدش عليه.
وقال أيه حرية رأي وتعبير .. ولا يكونش كان قصدهم مادة اللغة العربية بتاعت المدرسة والتعبير كل ما تكون السطور كتير وما تتفهمش ينجحوك .
– مصر تعيش في مهزلة أسمها حرية .. طيب هيا فين حد يدلني ..
أزاي تبقى في حرية وأنت عارف أن مليون كرباج هينزل عليك لمجرد أنك قولت رأي .. وكأنك أثرت الفتنة بين جموع الشعب.ومتهم بأحداث البلبلة وإثارة الشغب ولستة من التهم وده ليه عشان مجرد رأي .
حتى لو كان الرأي غلط لابد من وجود حالة من الحوار السليم مش الخناقات الكلامية …
ومن أسس الديمقراطية وأصولها أنك تأخد بكل الأراء لكن نعمل ايه
ومن الأخر هيا حرية نص كم ولا يمكن ما حصلش حتة قماش ..
سلام
