مع العيد اعود من جديد

سلام الله عليكم، كل سنة وانت بخير حال بدأت التدوين على Blogger بداية من عام 2006، بدأتها تحت اسم فارس بلا جواد. وكنت باكتب في مواضيع مختلفة وكل مرة كنت بافتح مدونتي واقرأ اللي كنت باكتبه اشوف مدى جهلي واحياناً التفاهة في النظر للأمور او الكتابة في امور لم اعد اهتم بها اطلاقاً الأن … وبعد تخرجي ودخولي الخدمة الوطنية (التجنيد الاجباري) في عام 2010 وتوقفت تماماً عن التدوين، وبعد خروجي في اكتوبر 2011 رجعت اكتب حاجات بسيطة، ولان الفترة دي كان الشأن العام بيشغل بال كل شاب مصري، كان هو المسيطر عليا في كتاباتي … لكن وقتها كنت بدأت في عملي المستقل، ومدونتي الانجليزية المتخصصة في تصميم مواقع الانترنت، والحمد لله انها كانت واخدة كل تركيزي ..

وتوقفت عن الكتابة من تاني في مايو 2013 وكمان كنت بدأت الكتابة في عدد من المواقع التقنية المتخصصة، بمقالات عن تصميم وتطوير واجهات مواقع الانترنت باللغة العربية .. من فترة بدأت افكر تاني في انشاء مدونة شخصية بالعربي، عشان تكون منصة لتبادل المعرفة والخبرة، خاصة ان وسائل التواصل الاجتماعي زحمة جداً ومليانه بالمنشورات المفيدة لكن للأسف لكثرتها لا اعتقد ان في اي شخص بيستفاد منها حقاً … بيكتفوا احياناً بالمشاركة (Share) بس وخلاص. ولأن من فات قديمه تاه، بدأت في التفكير في تجديد مدونتي القديمة فارس بلا جواد، وبحثت عن طريقة لنقل كل المحتوى من على خدمة Blogger عشان تكون في موقعي الشخصي الجديد اللي مبني على تطبيق الـCMS مفتوح المصدر وردبريس ووجدت مقالة اجنبيه رائعة عن استيراد محتوى البلوجر في الوردبريس من غير ما تفقد كل زوارك/ روابطك على المدونة القديمة، وان شاء الله يتسنى لي الوقت واترجمها في تدوينه هنا بأذن الله هاتكون مدونة | فارس هي منصتي لنشر العلم القليل اللي تعلمته في المجالات:

• تصميم واجهات المواقع والتطبيقات (UI Design).
• تطوير مواقع الانترنت (Front End Developing).
• تجربة المستخدم وفلسفيات التصميم (UX Design)
• ريادة الأعمال (Entrepreneurship).
• الاعمال والانشطة التطوعية (Volunteering).

ماليش دعوة بالسياسة تماماً ونهائياً واتمنى اقدر افيد بأذن الله، وتكون العودة للتدوين من جديد فيها الخير وصلاح النيه والعمل مصدر الصورة | http://goo.gl/yazkQ